IS-te'n Syria-ah khawpui an lak belh

Islamic State (IS) firfiak pawl chuan Syria hmarchhak lama Hasakeh khawpui chu security force-te kut aṭangin an la leh.

Syrian Observatory for Human Rights chuan sorkar sipai leh firfiakte hi nasa takin an bei a, an inbeihnaah sipai 30 leh firfiak 20 vel an thi tiin an sawi. Ningani khan firfiakte hian khawpui hi an la a ni.

IS-te hian Nilaini zan aṭang khan Hasakeh khawpui lak tumin an bei a, checkpoint-ah thihchilh bomb an tipuak tih a sawi. IS-te hian khawpui chhim lama district pahnih an la tawh a, chhim biala civil mi tam tak chu hmarlamah an tlanchhe tawh a ni.

Hasakeh khawpui chhunga thuneihna hi Kurdish hel leh sorkar lamin an insem a ni. Kurdish sipaite hian khawpui hmarlam leh hmar thlanglam an thunun a, sorkar sipaite hian khawpui chhim lam an thunun thung.

Firfiakte hian Hassakeh khua aṭanga kilometre 270 vela hlaa awm, Syria hmarchhak biala khawpui pawimawh, Kobane chu lak tumin an bei mek bawk. He khawpui lak an tumnaah hian Syria sipaite nen thla eng emaw zat an inbei tawh a ni.