Pakistan-ah khaw lum vanga thi 1000 an tling tawh
Pakistan chhim lam, Sindh province-a khaw lum vanga thi chu 1,000 chuang an tling tawh.
Khaw lum vanga thi zingah hian Sindh province khawpui, Karachi-a cheng mi 950 an tel a, damdawi in hrang hrangah khaw lum vanga taksa lama harsatna tawk mi sang tel enkawl an ni bawk.
Ningani aṭang khan Karachi-a khaw lum lam hian ziaawm lam a pan deuh a, degree celsius 38-ah a tla thla. Mahse thuneitute chuan thi zat hi an la punchhoh zel an ring.
Khaw lum tuartu tam zawk hi chhun nisa hnuaia hnathawk chhuak te, mi rethei chenna nei lo te a ni. Hetihlai hian khaw lum vanga harsatna thleng mekah sorkar lam chu a che muang lutuk nia sawiin sawiselna pawh a tam hle.
Karachi khawpuiah chuan vawi tam tak electric supply a khaihlak a, air condition leh fan-te pawh hman mumal theih lohin a awm fo a ni.
Mitthi an pun chak em avangin khawpui chhunga damdawi-in hrang hranga mitthi ruang dahna hmunte pawh a indaih lo hle. Medical official-te chuan ruang dahna hmuna refrigeration unit-te chu a ṭhat loh avangin ruangte hi body bag-ah dahin, chhuatah an dah tlar mai tih an sawi.
Sindh province thuneitute chuan khaw lum avang hian mipuite chu pawn chhuak tam lo turin an ngen. Khaw lum hnuaia in enkawl dan hriattirnate an tichhuak a, damdawi lam thiamte chuan mipuite'n inenkawl dan an thiam tawk loh avangin thi pawh hi an tam phah niin an ngai.
Thuneitute chuan mipuite chu thawmhnaw hnawng inbel tur te, khaw lum zual lai chuan an kut tuivawta chiah tur te, fan chu tukverh bula dah a tinung tur leh, thawmhnaw thawl lam inbel turin an hriattir.