MERS hri leng danna tur dan thar siam

South Korea chuan an rama hri leng mek, Middle East Respiratory Syndrome (MERS) dan­na turin dan thar a siam.

Parliament chuan he dan thar hi Ningani zan khan a pass a, he dan hnuaiah hian MERS hri vei, hri an kai dan chungchanga dawt sawite chu hremna na tak pek theih an ni a, jail-a tantir thlenga hrem theih an ni. Hei bakah hian sorkarin hri leng laka invenna tura ruahmanna a siamte zawm duh lo chu hrem theih an ni bawk.

MERS hri vei fin­fiahte chu investigator-te'n hri an kai dante an zawtchiang ṭhin a, inves­tigator-te thu dik lo an hrilh a nih chuan kum hnih lung-in tan emaw, an ram pawisa won maktaduai 20 (dollar 18,000) thleng chawitir theih an ni ang.

Thuneitute chu MERS veite khuahkhirhna tura thu­neihna sang zawk pek an ni bawk.

Sorkar chuan hri darh zel tur venna kawnga thawk­tu a dah chu a letin a tipung bawk ang.

Hetihlai hian SKorea-ah hian MERS vei hi hmuh belh an la ni reng a, hri vei finfiah tawh hi mi 181 an tling tawh. Nimin khan a vei zinga pahnih an thihbelh leh bawk. Thite hi kum 79 leh 80 mi an ni.

MERS hri hi kum 2012 khan Saudi Arabia ramah hmuh ṭan a ni, he hri hi camel aṭanga rawn chhuak nia hriat a ni. Mihring leh mihringah he hri hi inkaichhawn theih a ni a, tun thlengin hri danna, vaccine emaw a enkawlna bik damdawi a la awm lo. Hri kai zinga 36% in an thihpui a ni. MERS veite chuan khawsik, khuh ro leh thawk lama harsatna an nei a, pneumonia pawh a nei tel fo. Pum lam nuam lo, khaw ṭha lote an nei bawk.