Myanmar Parliament-in danpui siamṭhat rawtna a hnawl

Myanmar Parliament chuan sipai sorkarin an ram danpui a lo siam tawh siamṭhat rawtna chu a hnawl. Rawtna hnawl a nih avang hian eptu hruaitu, Aung San Suu Kyi-i chuan president a chuh thei dawn lo.

Danpui siamṭhat rawt chungchang hi Parliament-ah ni thum zet sawiho a ni. He rawtna hian sipai thu­neihna a tihnep dawn vangin sipai lam aiawh leh eptute pawh an inhnial nasa hle a, a tawpah hnawl a ni.

Myanmar ramah hian kum 2011 khan sipai rorelna tihtawp ni mah se, parlia­ment hi sipai aiawhte'n an la thunun zawk a, member tam zawk chu sipai aiawh leh gene­ral hluite an ni.

436 amendent bill chung­chang chu sawiho a, vote lak a nih hnuah hnawl a nih thu speaker Shwe Mann chuan a sawi. Vote laknaah hian a thlawptu lamah 60% tla mah se, tlang tur chuan 75% thlawptu neih a ngaih avangin a tlang zo lo.

Dan siamṭhat an tum hi ramdang mi laka fa neite'n an ram president dinhmun chuh ve thei lohna dan a ni. Mahse an thlak danglam theih tak loh avanign British mi pasal nei a, a pasal laka fapa pahnih neitu, Suu Kyi-i chuan Myanmar president dinhmun hi a la luah thei dawn lo a ni.

Suu Kyi-i chuan dan­pui siamṭhat tumna a hlawh­chham avangin mipuite chu beidawng lo turin a chah. Hei bakah hian kumtawp lama inthlanpui neih tur atan pawh inthlahdah phah lo turin an party chu a ngen bawk. "Tunah chuan inthlanpui neih tur atana theihtawp kan chhuah a ngai tawh a ni," a ti.