UN-in Yemen chhawmdawl nan $mtd 25 a pe

United Nations hnuaia Office for the Coordination of Humanitarian Affairs (OCHA) chuan Yemen tualchhung buaina tawk mekte chhawmdawlna turin emergency aid, dollar maktaduai 25 pekchhuah a nih thu a sawi.

Chhawmdawlna hi UN Central Emergency Response Fund aṭanga pek a ni. Ṭanpuina sum an pekte hi fuel, damdawi, emergency supply, tui thianghlim, sanitation sevice leh nutrition programe atana hman a ni ang.

UN Food and Agriculture Organi­sation leh World Food Program-in zir­chianna a neihah, Yemen ramchhunga mi maktaduai ruk vel chu chhawmdawl an ngai tih an sawi.

UN Security Council hotu, Stephen O'Brien chuan Yemen hian ṭanpuina tam zawk a la mamawh tih sawiin, an ram mipuite zing 80% chu ṭanpui an ngai a, a zahve vel chuan ṭam an hmabak mai dawn tih a sawi.

Yemen ramah han Houthi helhoin President Abdh-Rabbu Mansour Hadi paihthlak an tum a, helho leh sorkar sipaite hian hun rei tak an inbei tawh a ni. Saudi Arabia kaihhruai Arab ṭang­rual ramte chuan Yemen president hi thlawpin, helho lakah beihpui an thlak zui a ni.

Saudi Arabia hian Houthi hel a beihna peng pakhatah Yemen ram kalpawhna kawng tam zawk a dang a, hei vang hian Yemen ramin a mamawh a chawk luhna kawngah nasa takin harsatna a tawk mek a ni.

Tualchhung indona thleng vang hian mi 2,800 chuang an thi tawh, mi 13,000 velin hliam an tuar bawk.

UNSC chuan Yemen ram mipuite chhawmdawlna tura sum mamawh zat, dollar tluklehdingawn 1 aṭang chuan 10% vel chauh hmuh a la ni tih sawiin, ram hrang hrangte chu ṭanpuina sum pe turin a ngen.