Taiwan park-a kangmei chhuakah mi 516 an hliam

Taiwan khawpui, Taipei Amuse­ment Park-a color play party neihnaah Inrinni zan khan kang­mei chhuakin a puak zui a, mi 516 in hliam an tuar. An zinga mi 194 te chu an hliam na hle.

Party neihna hmunah hian mi 4,500 vel an tel. Color Play Asia hi Formosa Water Park-ah neih a ni a, stage-a powder spray an hman chu kangin, a puak zui ta niin an sawi. Vanduaina thlen lai hian stage bulah mi 1,000 vel an awm.

Hliam tuarte hi damdawi-in hrang hrangah hruai an ni a, an zinga tam tak hi an taksa 50% aia tam a kang a ni, meikhu an hip luh nasat avangin thawk lamah pawh harsatna an nei bawk.

State Council Taiwan Affairs Office chuan vanduaina thleng chu pawi an tih thu leh, hliam tuarte pawh ṭha taka enkawl an nih theihna tura an theih anga puih an inhuam thu a sawi.

New Taipei City mayor, Eric Chu chuan kangmei chhuak hi rang taka ṭhelh a nih thu a sawi a, hemi rual hian vanduaina thlen dan chu chhui chiang turin thupek tihchhuah a nih thu a sawi. Park hi khar lailawk tura tih a ni. Mayor hian party-naah powder kang thei chi hman a khap nghal bawk.

Police-te chuan Color Play Asia event manager, Lu Chung-Chi leh midang pali-te chu man an ni tawh tih an sawi a, thu zawhfiah an ni ang.