Russia PM hlui a thi

Russia Prime Mi­nis­ter hlui, Yevgeny Pri­makov chu hun rei tak a damloh hnu­ah Pathianni khan Mos­cow-ah kum 85 mi niin a thi.

Yevgeny Primakov hian prime minister din­hmun bakah, fo­reign minister leh spy hotu hna te pawh a lo chelh tawh a ni.

Kum 1929-a Ukraine khawpui Kiev-a piang, Prima­kov hi Georgia khaw­pui Tbilisi-ah a sei lian a, Moscow Institute for Oriental Studies-ah Arabic zirin state radio leh television-ah correspondent a ni ṭhin. Politics a luhchilh hnuah kum 1989 leh 1990 inkar khan Soviet par­liament-a chiarman atan thlan a ni a, Gulf War hmaa Iraq ram hruaitu, Sad­dam Hus­sein nena inbiakna a neih ṭum pawh khan chanvo pawi­mawh tak a chelh a ni.

Kum 1991-a Soviet Union a kehdarh hnu khan, Russia Foreign Intelligence Service (SVR) hotu atan ruat a ni a, kum 1996 January thlaah foreign minister atan dah leh a ni.

Kum 1998-ah kha­tih laia Russia Pre­si­dent, Boris Yelt­sin chuan prime mi­nis­ter atan Primakov hi a ruat a, mahse a lar chhoh chak avangin Yeltsin-a vek hian kum 1999 khan a ban leh a ni. Kum 2000-a president thlanna neih turah khan chuh a tum a, mahse Kremlin member ngah zualten inlung­ruala Vladmir Pu­tin thlawp an tum tak avangin a ṭhulh leh a ni.