Tunisia-ah misualin mi 38 a kaphlum

Tunisia rama chawlh hahdamna hmun lar tak, Sousse-a tuipui kama hotel chu mi pakhatin silai nen a bei a, mi 38 a kaphlum. Thi zinga a tam zawk hi ramdang mi, chawlh hmanga kalte an ni.

Hotel Riu Imperial Marhaba beitu hi Islamic State (IS) firfiak pawl chuan an pawl member a ni tih sawiin, a thlalak pawh an tarlang a ni. Tunisia thuneitute chuan IS-te thlalak dahchhuah hi kum 24 mi Saif Al-Deen Al Rezgui a nih thu an sawi. Al Rezgui hi Sousse hmarchhak lam mel 100 vela hla, Gaafour khuaa cheng a ni. Mahse he pawikhawihnaah hian IS hi a inrawlh ngei em tih erawh hriatchian a la ni lo.

Kar kalta Zirtawpnia pawi­khawihna thlen hun chhung hi minute nga vel nia sawi a ni. Pawikhawitu hian hotel bul tui­pui kama lo awmte chu kap in, tui­chennna hmuna awm leh hotel ba­thlarah awmte a bei zui a, a hnuah amah hi hotel parking lot-ah kaphlum a ni.

Tunisia Prime Minister Habib Essid chuan hotel beitu hian a nihliap hnuaiah AK-47 machine thurku-in tuipui kam hi a pan niin a sawi. Tuipui kam a thlen hian a silai ken hi la chhuakin a lo awmte chu a pawng kah a ni.

Inrinni khan Sousse aṭangin Tunisia khawpui, Tunis-ah ruangte hi lak an ni. Thi zingah hian British 15 an tel a, German leh French an awm bawk. Hliam tuar 39 an awm bawk a, an zinga ṭhenkhat chu an hliam na hle.

Inrinni zan khan Tunisia mi tam tak chu pawikhawihna thleng an duh lohna lantir leh, thi leh hliam tuarte an tuarpuina lantirin hotel-ah hian kalkhawm. Kal khawmte hian an hnam puanzar zarin, mitthi te hriatrengna atan bati an chhi bawk.