Belarus President bang tura phuttu thubuai siamsak

Belarus President laka lungawi lohna lantira nawrh huaihawttu zinga mi, Maria Kolesnikova chu an ram himna ngai pawimawh tawk loa puhin security law hnuaiah thubuai siamsak a ni. 

August 9-a an ram President thlanna neiha President nilai, Alexander Lukashenko thlan nawn a nih danah thil dik tawk lo leh vote tihchingpen a awm niin eptute chuan an sawi. Hmeichhe pathum kaihhruainain President bang tura phutin hun rei tak nawrh huaihawt a lo ni tawh a ni. Nawrh huaihawtnaa a bultumtu zinga hmeichhe pahnihte erawh chu ram dangah an tlanchhe tawh a ni. Kolesnikova pawh hi thuneituten ram dangah thawn chhuah an tum nia sawi a ni a, mahse duh loin a passport a pawtthler a ni. 

President duh lohna lantira nawrh huaihawtnaa a bultumtu hmeichhe pathumte chu Kolesnikova bakah inthlana eptu pawl candidate Svetlana Tikhanovskaya leh Veronika Tsepkalo te an ni. Tikhanovskaya hi Lithunia ramah a tlanchhe tawh a, Tspekalo pawhin an ram hi a chhuahsan tawh bawk. 

US leh European Union chuan Belarus ram inthlan neih zawh tak chu sawiselin a felfai tawk lo niiin an sawi a, President Lukashenko chu eptute nena inbiakna neih turin an phut. Mahse Lukashenko chuan an thil phut hi hnawlin, "Vote kan thlakin result pawh puan vek a ni tawh," tiin eptu lamin khawtlang  buaina an thlen chhunzawm zel chu tihtawp a hun tawh tih a sawi. Belarus President chuan kar ruk chhung a ban phuta nawrh huaihawt a, tualchhung buaina an tawh mekah US chu inhnamhnawihah a puh bawk. 

Russia chuan Belarus President hi a thlawp thung a, Thawhṭanni khan Russia President Vladimir Putin leh Lukashenko-te hi inkawmin Putin chuan Belarus ram dinhmun siamṭhatna turin loan, US tluklehdingawn 1.5 pek a remti a ni.