Iran-in Israel inremna siampui vangin UAE leh Bahrain a vau

Iran President Hassan Rousani chuan Arab ram pahnih, United Arab Emirates (UAE) leh Bahrain-te chu Israel inremna an siampui avangin eng pawh an ram chungah thleng se, a mawhphurtu an ni tih a sawi. 

US President Donald Trump hma­laknain UAE leh Bahrain hian Israel inzawmpui siampui an remti a, Thawh­lehni khan White House-ah Israel prime minister Benjamin Netanyahu, UAE foreign minister Sheikh Abdullah bin Zayed al-Nahyan leh Bahrain foreign minister Abdullahtif al Zayani-te chuan President Trump-a kaihhruainain inremna hi an ziak fel a ni. 

Arab ram dangte chuan he inremna siam hi na takin an sawisel a, a bikin Palestinian mite leh Iran ramin an helh zual bik hle. Iran President chuan Nilainia cabinet meeting-ah he inremna chungchang hi sawichhuakin, UAE leh Bahrain chuan a nghawng an la tuar ngei dawn niin a sawi. Israel chu nitin Palestinian-te laka pawikhawihna thlentu nia puhin, hetih lai hian Middle East ram ṭhenkhat leh an roreltute chuan heng thil thleng hi an hrethiam lo a ni, a ti. Gulf ram ṭhenkhat chu US leh Israel-in milem an duh dang anga an khawih danglam mai mai theihah an chang ta a ni, tiin a sawi. 

Israel, UAE leh Bahrain-ten inremna an ziah lai hian, Gaza Strip-ah Palestiniante chuan buaina siamin, rocket hmangin Israel an lo kap a, Israel sipaiten an chhang let ve nghal. 

Thawhlehni khan Gaza aṭang hian rocket pahnih hmangin Israel kah a ni a, pakhat hi Ashdod khuaah tlain mi pahnihin hliam an tuar. Nilaini zing lam khan Israel beihna atan vek hian rocket 13 kah chhuah leh a ni bawk. 

Gaza Strip aṭanga rocket hmanga beihna hi Israel sipaite chuan chhang letin, Hamas ho awm hmun eng emaw zat chu an bomb chhiat sak ve nghal a ni. Israel PM Netanyahu chuan Hamas firfiakte chuan Arab ram pahnihte nena inremna an siam chu tihchhiat tum mah se, an hlawhtling dawn lo tih a sawi. Israel bei a, an mi leh sate tihnat tuma kut thawhte chu na takin an bei let nghal zel dawn tih sawiin, hemi rual hian boruak ṭha siam a, inremna siam duhtute lakah an inhawng reng tih a sawi. 

Palestinian-ten nasa taka sawiselin dodal mah se, Israel nena inremna an siam chu Palestinian-te hian an chhawr ṭangkai dawn hle tih UAE economy minister Abdullah bin Touq chuan a sawi. 

Israel nena inremna an siam hnuaia insumdawnna tur chu US dollar maktaduai 550 vel a tling dawn nia sawiin, ramriah goods service investment te an remti dun dawn a, scientist, executive, zirlai, academic expert leh sakhaw hruaitute tan pawh exchange programme te an siam dawn tih a sawi. An insumdawn tawnna hian economy ṭhanna kawngah a pui dawn a, economy a ṭhat chuan mi zawng zawngin a hlawkna a chhawr thei vek dawn a ni, a ti.