October-ah Covid-19 vaccine sem chhuah hman tum : Donald Trump

US president Donald Trump chuan Nilaini khan  October thla aṭang hian Covid-19 vaccine chu US pumah sem chhuah hman tum a nih thu a sawi a, kumin chhungin dose maktaduai 100 dawn chu sem chhuah hman tum a ni, a ti. 

"Kan beisei dan chuan thla leh aṭang hian Covid-19 vaccine chu hman theiha sem chhuah hman kan tum a, vaccine hi a him ṭhat tawk ngei pawh kan beisei a ni. Kan ruahmannate a hlawhtling thei a nih chuan October thla lai hawl aṭang hi chuan vaccine hi semchhuah hman kan tum a ni," tiin Trump chuan a sawi.

Trump chuan kumina an ram president thlanna neih tura a khingpui Democratic presidential candidate, Joe Biden chungchang pawh sawiin, vaccine siamna kawnga a do zawnga thu leh hla vawrh darh lo turin a hriattir a, vaccine siam hi thil pawimawh tak a nih thu a sawi bawk. 

US Centers for Disease Control and Prevention-a director Robert Redfield chuan US Senate committee-ah nakkum kum lai hawl hma chu an ramin Covid-19 vaccine a siam chu peihfel hman a nih dawn loh thu a hrilh a, hemi chungchangah hian Trump chuan thu dik lo a sawi niin Robert hi a puh a, miten an sawi lawk aia hmain vaccine chu peihfel hman tum a nih thu Trump chuan a sawi.

Johns Hopkins University tarlan dan chuan US-a Covid-19 hri kai hi mi 66,16,458 an tling tawh a, heng zinga mi 1,96,436 chuam hri hi an thihpui tawh a ni.