Myanmar-in hri kai enkawlna siam dawn

Myanmar sorkar chuan an ramah Covid-19 kai an puh belh zel avangin Yangon khawpuiah  hri kaite enkawlna tur bik, field hospital a siam mek. 

Thawhlehni khan hri kai hmuh chhuah thar mi 307 awmin ni khata hri kai hmuh chhuah tam ber ni a ni. Nimin khan mi 134 hmuh chhuah belh lehin, hri kai

hmuh tawh hi mi 3,636 an awm tawh a, mi 39 in an thihpui tawh bawk. 

Yangon-ah hian hri kai enkawlna atan hospital pathum hman a ni a, hei bakah hian khum 500 awm theihna tur, field hospital hi football ground-ah a siam mek a ni. 

Hri kai an pun belh zel avangin khuahkhirhna pawh siam thar leh a ni a, sorkar hnathawk Deputy Director level hnuai lamte chu thla khatah kar hnih in lam aṭanga thawk a, kar hnih dang office-ah thawk tura tih an ni. 

State Counsellor Aung San Suu Kyi chuan mipuite chu hri darh tur venna atana sorkarin dan a siamte ṭha taka zawm turin a ngen. Hri kaite enkawlna tur damdawi leh enkawlna tur hmunte pawh an ruahman zel a nih tur thu a sawi. 

Yangon khawpui chu hri kai tamna ber niin Covid-19 kai hmuh tawh hi 1,850 an tling tawh a, Rakhine state chu a dawttu niin mi 722 in hri an kai tawh a ni. 

Myanmar ramah hian sipai rorelna hnuaia an awm lai khan health system lam ngaihthah a nih avangin khawvela health system chhiatna ram zingah pawh a tel a ni. March thla khan World Bank chuan mi nuai 51 chenna, Myanmar ram pumah ICU khum 383 chiah awmin, ventilator 249 chiah an nei niin a tarlang. Mahse he report tihchhuah hnu hian ventilator eng emaw zat chu Myanmar ram hi pek a nni tawh a ni.