Israel-in Gaza pan tum lawng a dang
Israel Navy-te chuan Gaza Strip pana kal lawng an lo dang a, Israel ram chhunga lawng chawlh hmunah an dintir.
Lawngah hian activist 20 an an chuang a, Gaza Strip-a Palestinian mite chhawmdawlna tur an phur tih an sawi. Lawnga chuang zingah hian Israeli Arab hruaitu Basel Ghattas leh Tunia President hlui Moncef Marzouki-te pawh an tel.
Navy-ten lawng an lo dan hi Palestinian thlawptu activist-ten lawng pali hmanga Gaza an panna, Freedom Flotilla III an tiha lawng pakhat a ni. A dang pathumte pawh hian Gaza lam pan an tum a ni. Lawngah hian Sweden hnam puanzar an zar a ni.
Israel chuan navy-te'n lawng an dap a, an lo tihdin avang hian dan an bawhchhe lo tih sawiin, dan hman mek palzutna thleng tur an venna a ni, a ti. Hei bakah hian navy-te'n lawng an dapnaah hian tharum thawhna thleng a awm lo tih a sawi.
Israel sipai chuan thuchhuah siamin, "International law zawm a, an kal tumna kawng thlak tur hian Israel Navy-te chuan Gaza pan tumtu lawng hi vawi tam tak a hrilh a ni," a ti. Mahse navy-te ngenna an ngaih pawimawh duh loh avangin lawngah hian kalin, an dap ta a ni, a ti. Lawng hi Israel chhim lama Ashdod lawng chawlh hmun panpui a ni.
Prime Minister Benjamin Netanyahu chuan tuipui lama Gaza Strip an dan chu international law behchhana ti an nih thu leh, hei hi United Nations committee pawhin a pawmpui thu a sawi. "Lawnga Gaza pante hian dawt an sawi mai a ni a, an tum tak chu Gaza Strip-a Hamas firfiak pawlte puih a ni. Kan bial chhunga harsatna kan tawhte hi an hre duh lo a ni," a ti. Tunhma lama Gaza bial chhunga firfiakte hman tur indona hmanrua lakluh ang chu a thlen an remti tawh dawn lo tih a sawi bawk.