Chaw ngheia nawrh huaihawt Palestinian chhuah dawn

Israel tan-ina tang mek, Palestinian mi Khader Adnan chu ni 55 zet chaw ngheia nawrh a huaihawt hnuah chhuah zalen a ni dawn.

Khader Adnan-a ukil, Jawab Boulos chuan July 12-ah chhuah a ni dawn tih a sawi a, a chhungte pawh hriattir an ni tawh. Chhuah a nih dawn tak avangin Adnan pawh hian chaw ngheia a nawrh tihtawp a remti bawk.

Adnen hi 'adminstrative detention' tih hnuaiah Israel ramah thla 11 zet tantir a ni tawh. He dan hnuaiah Israel hian thubuai siamsak chuang loin hun rei tak mi a tantir thei a, Palestinian mi a man tam tak lakah he dan hi a hmang a ni. Adnan pawh hi 'administrative detention' hmang hian vawi kua a man a tawh a ni.

Chhuah phuta ni 55 zet chaw ngheia nawrh a huaihawt avangin Adnan hi a taksa pawh a chak lo hle a, Ramla tan-ina clinic-ah enkawl mek a ni. A hriselna dinhmun tlakhniam zel avang hian UN Middle East palai Nikolay Mladenov pawhin chhuah zalen turin a lo ngensak tawh a ni. Pathianni khan Tel Aviv bula a tanna-ah Adnan hi a chhungte tlawh phalsak a ni.

Adnan hian a hmaa man a nih ṭum pawhin chhuah phutin chaw a lo nghei tawh bawk a, ni 66 zet chaw a nghei hnuah, kum 2012 February thla khan tan-in aṭang a chhuah phalsak a lo tawh bawk.

Israel security service, Shin Bet chuan Adnan hi Islamic Jihad group mi leh sa niin a sawi a, mahse finfiahna erawh an nei lo.