July 6 thleng Greece-ah bank khar dawn

Leiba a ngah avanga talbuai mek Greece chuan a rama bank-te chu July 6 thleng a khar dawn.

Greece hian leiba tam tak a neih mek aṭanga inkhaihchhuah dan kawng a zawng mek a, hemi atana eurozone ramte nena inbiakna an neih mekah inremna an la siam thei lo.

Inremna an la siam theih loh avangin European Central Bank chuan Greece tana emergency fund a pek ṭhin chu a chhunzawm tawh dawn lo a, hei vang hian Greece sorkar chuan July 6 thleng ramchhung bank-te chu khar a rel a ni. Nimin khan Athens stock exchange pawh khar a ni bawk.

Sorkar chuan bank khar chhunga ATM aṭanga pawisa lakchhuah theih zat pawh a bituk a, ni khatah card pakhat hmangin dollar 65 chin chauh lak theih a ni ang.

President Prokopis Pavlopoulos leh Prime Minister Alexis Tsipras-te chuan thupek siam tharah hian hming an ziak a, ruahmanna thar an siam chu Greece financial system venhimna atana thil tih ngai a ni, an ti.

Bank-te hi July 7-ah hawn an ni ang a, ATM pawh July 6 chawhnu lam aṭangin dan pangngaia kaltir leh a ni ang.

Sorkar thuchhuah chuan bank khuahkhirhna hian pension hlawh pekchhuah tur erawh a huam tel lo tih a sawi. Hei bakah hian ramchhunga online banking transaction pawh a ngaia kalpui niin, dawr-ahte card payment tih theih reng a ni ang. Rampawn lama sum thawnchhuak tur chuan Ministry of Finance Commission remtihna lak phawt a ngai dawn a ni.

Eurozone finance minister-te chuan inremna an siam theih loh chhanah Greece an puh. Mahse Greece chuan an rawtna siamte chu a hlawhtling thei dawn lo tiin a sawi thung a, inremna an lo siam tawh chu pawhsei a, vote an lak hma chu hman chhunzawm rih a rawt. Inremna an hman mek hi vawiin hian a tawp dawn a ni.