
Gaza-ah chhawmdawlna metric ton 32,000 thawn lut tawh
Israel leh Hamas-in January 19 aṭanga Gaza Strip-a inkahhai an puan hnuah Gaza Strip-a chengte chhawmdawlna tur ei tur leh mamawh dangte metric ton 32,000 chuang thawn luh a ni tawh ti UN food agency, World Food Programme chuan a tarlang.
Gaza Strip-a inkahhai puan thawh khatna kalpui mek hi kar ruk awh tura tih a ni. Thla 15 chuang an indo hnuah inkahhai hi puangin, inremna an siam hnuaiah Israel leh Hamas hian an mi mante an inthleng tawn bakah, Gaza Strip-a chengte tan ei tur leh chhawmdawlna hrang hrang thawn luh a ni bawk.
Israel chuan inremna an siam angin Gaza-ah hian chhawmdawlna phurtu truck 600 chu nitin an luh a phalsak dawn tih a lo sawi tawh bawk. Inkahhai puan hnuah truck 4,200 an lut tawh niin a sawi.
Nitin chhawmdawlna ṭhahnem tak lut tawh mah se, kawng chhia leh bomb puah mai hlauhthawnna a la nasat avangin a sem chhuah kawngah harsatna an la tawk niin huminatarian group-te chuan an tarlang. Chhawmdawlna phurtu truck-te hi Gaza hmar lam leh chhim lamah an lut a ni.
Inkahhai puan a nih hma pawh khan chhawmdawlna hi thawn luh reng a ni tho a, mahse motor lut thei zat erawh Israel lamin a bithliah sak a ni. Mahse truck-a an thil phurhte chu armed group-ten an ruksak fo a, chhawmdawl hna thawktuten beih an tawh ṭhin vang leh, Israel-in an thil sem dante a endik sak reng avangin harsatna an tawk fo niin an sawi. Mahse Israel chuan UN leh humanitarian organisation-te chu Gaza mipuite chhawmdawlna leh puihna tur phurh luh a nih hnuah pawh a sem chhuah kawngah an thawk ṭha tawk lo niin a puh ve thung.
UN Palestinian relief agency, UNRWA (United Nations Relief and Works Agency for Palestine Refugees) chuan Israel-in Hamas thurualpuia puh a, a ram leilunga hna thawh khap tawh mah se West Bank leh Gaza Strip-a Palestinian-te chhawmdawl hna an thawh chhunzawm zel thu a sawi. UNRWA communications director, Juliette Touma chuan Gaza-ah an mi leh sate an la awm thu leh, mipuite mamawh pawh an la phurh luh zel thu a sawi. An hnathawh tih buai leh dan chah an nih chuan Gaza-a inkahhai puan mek chu a chhiat phah a hlauhawm thu a sawi.