Iran-in anti-warship cruise missile enchhin

Iran chuan km 1,000-a hla kap pha tur, anti-warship cruise missile chu Inrinni liam ta, February 1, 2025 khan hlawhtling takin a enchhin niin state TV chuan a tarlang. He missile hian Persian Gulf leh Sea of Oman-a US Navy lawngliante a kap pha dawn a ni.

Revolutionary Guard-a navy hotu, Gen Ali Reza Tangsiri chuan cruise missile enchhin chu Ghadr-380 mile type a ni tih sawiin, he missile hian an hmelmate indo lawng chu a tichhe thei vek dawn niin a sawi.

An missile enchhin chu a ṭha hle tih sawiin, an enchhinna hmun erawh an tarlang lo. He missile hi member pakhat pawhin minute nga pawh tling loah buatsaihin a kap chhuak thei tiin an sawi.

Kum 2011 aṭang khan Iran hian underground missile facility a neih thu leh, missile a enchhin thu hi a sawi fo a ni. Underground facility hi an ram chhim lama tuipui kam, Strait of Hormuz bulah leh ram chhung hmun dangah pawh a neih thu a sawi. Km 2,000 chuang kap thei, Israel pawh kap pha tur missile a nei niin a lo insawi tawh bawk.

Kumm 2024-ah khan Iran hian Hamas leh Hezbollah te a thlawpna lantirin missile tam tham tak hmangin April leh October thla khan Israel a lo kap tawh a, mahse a missile kah chhuah zinga a tam zawk chu Israel lamin an lo kah thlaksak a ni.