Israel-in Gaza hmarlam a bomb

Israel indo thlawhtheihna te chuan Pathianni zan khan Gaza Strip hmar lam an bomb a, hei hi a hmaa Gaza aṭanga rocket eng emaw zat hmanga Israel chhim lam beih a nih vanga an chhan letna a ni.

Thlawhtheihna hmanga Gaza beih a nih bakah, Gaza Strip hmarchhak lam leh Israel ramri inkara Israel tank dahte chuan Beit Hanoun khua chu ṭum kua zet an kap a, mahse hliam an awm hriat a ni lo.

Israel drone leh indo thlawhtheihnate chuan Islamic Hamas movement hnuaia Islamic Jihad leh left-wing Popular Front (PFLP) te post leh hmun pawimawhte chu ṭum 15 zet an kap a ni.

Gaza health ministry thupuangtu, Ashraf al-Qedra chuan Israel beihpui thlaknaah hian civil mi pahnihin hliam an tuar a, damdawi-in panpui nghal an nih thu a sawi. Pathianni chawhnu lam aṭang khan Israel sipaite chuan Gaza Strip hmarlam chu tank leh thlawhtheihna hmangin ṭum 46 an kap hman niin an sawi bawk.

Pathianni zing lam khan Gaza Strip hmarlam aṭang hian eng pawl tih hriat lohin Israel chhim lama Sderout khuaah rocket pali an kap a, rocket pakhat hian in pahnih a tichhia a ni. A hnuah Salafist hnuaia helpawl pakhat chuan rocket hi an kah niin an sawi.