Iraq-ah mi 36 khaihlum

Iraq sorkar chuan kum 2014-a sipai lak tharte beihnaa inhnamhnawiha puha thiam loh chantir, mi 36-te chu a khaihlum.

Kum 2014 khan Tikrit bula military base, Camp Speicher-ah sipai atana lak thar mi 1,700-te chu kidnap an nih bakah tihhlum an ni. He inbeihna thleng hi Islamic State (IS) firfiak pawl chuan an tih niin an chhal a, sipaite an suat lai thlalak leh video-te pawh kum 2014 khan an tichhuak a ni. Nikum khan an mi thahte an dahkhawmna thlan lian tak chu Iraq sipaiten an hmuchhuak.

Dhiqar governor thupuangtu chuan Speicher pawikhawihna thleng rapthlak taka inhnamhnawih, mi 36-te chu Pathianni zing khan Nasiriyah tan-in ah khaihlum an ni tih a sawi. Mi tangte an khaihlum lai hi Dhiqar governor Yahya al-Nasseri leh Justice Minister Haidar al-Zamili te pawhin an thlir a ni.

Kar hmasa khan Iraq President Faud Masum chuan mi 36-te tihhlum hi a lo remti tawh a, hemi hnu hian Nasiriyah tan-inah hian sawn an ni. IS firfiakten sipai an tihhlum zinga 400 vel hi Dhiqar province aṭanga kal an ni.

Pathianni-a mi 36 tihhumte hi an vaiin Iraq-ah man an ni a, February thla khan thi tura hremna pek an ni. An zinga ṭhenkhat chuan sipai lak tharte beih an nih lai hian Tikrit bul hnaiah pawh an awm lo niin an sawi a, ṭhenkhat chuan an thubuai ngaihtuah laiin lawyer pek an ni ve lo niin an sawi bawk.

Firfiakte hian Camp Speicher hi an hual hnuah, camp-a sipai lak tharte hi an inpe a ni. An zing
aṭang hian firfiakte chuan Shia mite thlang chhuakin, motor-in an tlanchhuahpui a, hemi hnu hian leiah bawhkhup tirin an kaphlum zui ta a ni.