IS-ten thihchilh bomb tipuaktu atan naupang hmang

Turkey ram, Gaziantep khuaa inneih lawmna hmuna thihchilh bomb tipuaktu chu napang kum 12-14 inkar vel a nih thu Turkey President Recep Tayyip Erdogan chuan a sawi. Inneih lawmnaa bomb puak vang hian mi 51 an thi a, mi dang tam takin hliam an tuar a ni.

President Erdogan chuan bomb tipuaktute hi Islamic State (IS) firfiak pawl an nih thu a sawi a, inneih lawma kawngpuia lamte awmna laiah bomb hi tipuah a ni, a ti.

IS firfiak pawl hian naupang sipai, 'cubs of the caliphate' tia an koh eng emaw zat an nei a, heng naupangte hi IS enkawl school-ahte an thuthlung te zirtirin, pawikhawihna an thlenna hmun hrang hrangte entirin an hruai bawk. Mipa naupangte chu an mi mante lu tansak laite an entir bakah, anmahni ngei pawh an kahhlum tir ṭhin. Mipa naupangte pawikhawihna thlen dan zirtira training an pe lai video-te pawh an lo tichhuak tawh a ni.

Pathianni khan Iraq hmarlama Kirkuk khuaah IS member, mipa naupang, kum 12 mi vel chu thihchilh bomb a pai a tihpuah hmain Iraq police-ten manin, a bomb pai an lak sak hman. He mipa napang hian Shia moque-ah a bomb pai hi tihpuah a tum nia sawi a ni.

Firfiak pawl dang pawhin naupangte hi hmatheh atan an hmang fo. UNICEF leh human rights group report chuan Nigeria helpawl, Boko Haram chuan thihchilh bomb tipuaktu atan naupangte an hman fo tih an sawi. Human Rights Watch chuan kum 2009-a Boko Haram-te sorkar laka an helh aṭang khan naupang za tel chu thihchilh bomb tipuaktu atan an pawlah an la lut tawh a ni, a ti.

Al-Qaida pawhin a pawl member atan naupangte lain, thihchilh bomb tipuaktu turin training an pe ṭhin. Iraq-a al-Qaida hotu, Abu Musab al-Zarqawi chuan Iraq-a America mite bei turin tleirawlte hmatheh≠ah a hmang ṭhin bawk.