Egypt public prosecutor car beihnaah amah a thi

Egypt public prosecutor, Hi­sham Barakat (65) chu Cairo khaw­puiah bomb hmanga a car beih a nih avangin a thi.

Barakat-a car hi khawpui dai, Heliopolis-ah beih a ni a, hliam na tak tuarin damdawi-inah hruai nghal ni mah se a hliam tuar loin a thi ta a ni. Midang pariatin hliam an tuar bawk.

Kum 2013-a Egypt President aṭanga Mohammed Morsi paihthlak a nih hnu khan Barakat hian lungawi lohna lantira buaina chawk chhuak mi tam tak thubuai a ngaihtuah sak a ni. Morsi-a party, Muslim Brotherhood thlawptu mi za tel chu thi tura hremna leh, dam chhung tang tura hremna thlenga pek an ni.

Barakat hian a hma pawhin thahah vau a lo tawk fo tawh a ni.

Mita hmutute chuan Barakat-a car beihnaa bomb tihpuah hi a na hle tih an sawi a, a bul vela chenna-ina tukverh-te pawh a keh bakah thingkungte pawh a kang tel tih an sawi. Barakat hian a dar, awm leh taksa hmun dangahte hliam a tuar a, damdawi-inah hian zai nghal ni mah se a damchhuak zo ta lo tih Justice Minister Ahmed al-Zind chuan a sawi.

Public Prosecutor thah a nih avang hian nimin khan Egypt ram pumah sun a ni a, June 30-a President hlui Morsi-a paihthlakna tura hma lak a nih ṭanna champha an lawm ṭhin chu ṭhulh a ni.

President Abdel-Fattah El-Sisi chuan Barakat chu a ui hle tih sawiin, "Egypt chuan dan lama mi ropui tak a chan ta a ni. Barakat hi a hnaa inpe zo, rorelna dik hlenchhuak tura mi inpe a ni," a ti.

Barakat hi Cairo-ah sipai chawimawina famkim nen vui a ni ang.