Japan-a Hakone tlang a kang

Japan Kanagawa biala Hakone tlang chu Thawhṭanni zan leh Thawhlehni zing khan a kang.

Japan Meteorological Agency (JMA) chuan Hakone tlangkang invawrh chhuak hi a la nasa lo a, mahse nasa zawkin a la thleng thei tih sawiin, mipuite chu inthiarfihlim turin a chah. Tlangkang nasa zawk a thlen chuan mihring chenna chin, Owakudani bial thlengin a nghawng thei tih an sawi .

Tokyo chhimthlang lama awm, Owakudani-ah hian chawlh hah­damna hmun nuam tak tak awmin khualzinte'n an tlawh nasa hle a, mahse tun hnaiah he bialah hian lir a nghing fo a ni.

Hakone town roreltute chuan May thla tir khan tlangkang vang hian Hakone tlang bulṭhut, meter 600 biala chengte chu insawnchhuak turin a lo ti tawh bawk.

Hakone hi tlawhtu an tam thei hle a, kum 2014 khan mi maktaduai 21 in tlawhin, an zinga hian ramdang mi 217,000 an tel.