Pakistan-ah khaw lum vangin mi 1,300 an thi

Pakistan ramah khaw lum avanga thi an pun belh zel a, Pathianni khan Sindd province khawpui, Karachi-ah mi 26 an thih belh leh. Khaw lum vanga thi hi mi 1,300 an tling tawh a ni.

Kar kalta chhung khan Karachi-ah hian khaw lum lam degree cel­sius 45 a tling a, khaw chin zirtute chuan khaw lum hian ziaawm lam a la pan dawn rih lo tiin an sawi.

Sindh province Health Minister Jam Mahtab chuan khaw lum vangin an province chhungah mi 1,300 dawn an thih tawh thu sawiin, an zinga 30% chu hmeichhia an ni, a ti. Mahtab chuan khaw lum vanga thi zinga 25% chu chenna in nei lo, ruihhlo ngai leh kawtthlera khawsate an ni tih a sawi bawk.

Karachi khawpui leh province chhung hmun dangahte power supply a la ṭha lo hle a, ni khatah darkar rei tak tak power nei loin an la awm a ni. Minister chuan power supply chu ṭha se, khaw lum vanga thi zat chuan a tlakhniam a rin thu a sawi. Pakistan sorkar chuan Karachi khawpuia power supply khaihlak fo chhan a chhui chiang dawn a ni.

Khaw lum vanga taksa lama harsatna tawk, mi 2,000 dawn chu khawpui chhung damdawi-in hrang hrangah enkawl mek an ni bawk.

Mahtab chuan khaw lum vanga thi, damdawi-ina ruang dah tam tak chu lamtu an awm lo tih a sawi a, ruang lamtu nei lo 200 vel chu a ruala phum an ni tawh tih a sawi.