Iraq PM-in sipai hotu a chawlhtir

Iran Prime Minister Haider al-Abbadi chuan an ram sipai hotu lu ber, General Babaker Zebari chu a chawlhtir.

General Babaker Ze­bari chawlhtir a nih chhan hi puanzar a ni lo a, a thlaktu atan hian Iraqi Air Force-a Kur­dish general, Anwar Ha­mad Amin chu dah rin a ni.

Zebari hian sipai hotu hna hi kum 10 dawn a chelh tawh a, amah ngei pawhin chawlh a duh thu a lo sawi fo tawh nia sawi a ni bawk.

PM hian an ram security force siamṭhat tumin police leh sipai officer eng emaw zat a lo ban tawh a ni. Iraq hmar leh khawthlang lam biala hmun eng emaw zat chu Islamic State (IS) firfiakte'n lain an thunun mek a ni. Firfiakte nen an inbeihnaa Iraq security force-te chu vawi eng emaw zat tlawmin an ralthuam, motor leh uniform-te thlengin an tlanchhiat san a, hei hi US pawhin a lo sawisel tawh a ni.

Kum 2011-a Ame­rica sipaite'n Iraq an chhuah­san hnu khan Iraq security force-te hian kaihruaitu ṭha leh trai­ning ṭha an neih loh avangin an tlahniam chak hle. Zabari hian America sipaite chhuah hma hian an ramah la awm zui se a duh thu a sawi fo a, Iraq sipaite chuan anmahnia ding turin hun rei tak an la mamawh dawn a ni, tiin kum 2020 vel thleng chu an ramah America sipaite chu la awm se a duh thu a sawi.

America hian a si­paite a lakchhuah aṭanga kum thum hnuah, IS firfiakte beih letna kawnga Iraq sipaite trai­ning leh thurawn pe turin sipai eng emaw zat a thawn lut leh tawh.