DR Congo helpawlin inkahhai puang

Democratic Republic of Congo khawchhak lama helpawl intelkhawmte chuan sorkar lakah inkahhai an puan thu Thawhlehni khan an sawi.

Helpawlte hian Congo khawchhak lam bial chhung hmun eng emaw zat chu an la tawh a, heng zingah hian khawpui pawimawh tak Goma pawh a tel. United Nations chuan Goma leh a chhehvela helpawl leh sipaite inbeihna avang hian mi 900 vel thiin, hliam 2,800 an awm bawk niin a tarlang.

Inkahhai puangtu helpawl intelkhawm hi Congo River Alliance an inti a, an zingah hian Rwanda sorkarin a thlawp, M23 helpawl pawh an tel. Congo River Alliance hian an ram lak chinah Congo sipaite chuan bomb-te thlakin civil mi tam tak an ti hlum niin an puh.

Thuchhuah an siamah, helpawlte hian ram lak belh an tum lo tih an sawi a, an ram lak chin erawh awp zuiin, civil mite venhim zel an tum tih an sawi.