Khawvelah Covid-19 hri kai mtd 30 chuang awm tawh

Nikum December thla tawp lam aṭanga hri leng, Covid-19 hri kai chu nimin thleng khan khawvel pumah mi maktaduai 30 an chuang tawh tih Johns Hopkins University chuan a tarlang. 

Johns Hopkins University tarlan dan chuan khawvel puma Covid-19 hri kai hi mi 3,01,81,110 an awm tawh a, he hri vanga thi hi mi 9,46,140 an awm tawh bawk. 

US chu hri kai tam berna ram leh thi tam berna ram a la ni zel a, nimin thlenga US-a hri kai tawh zat hi mi 66,75,053 an awm a, an zinga mi 1,07,641 chuan hri hi an thihpui tawh a ni. US-a he hri vanga thihna thlenna hmun hi New York-ah a tam ber a, thi hi mi 33,070 an awm tawh a ni. 

India chu Covid-19 hri kai tam berna ram dawttu a la ni zel bawk a, hri kai zat hi mi 52,14,677 an awm tawh bawk. Kumin September thla tir lam aṭang khan nitin India-a hri kai thar awm ṭhin hi mi 50,000 an pel deuh ziah a, India hi nitina hri kai thar tamna ber ram a ni a, hei vang hian kumin kum tawp lamah chuan hri kai tam lamah US a pelh mai a rinawm.

Brazil chu hri kai tam lama pathumnaah a la awm mek a, hri kai tawh zat hi mi 44,55,386 an awm. US tih loah chuan Brazil hi Covid-19 vang thi tam berna ram a ni a, he hri vanga thi hi mi 1,34,935 an awm tawh a ni. Latin America ram zingah chuan Argentina leh Mexico chu hri kai tamna ram an ni bawk.