Philippines-ah damdawi zuar mi 1,800 tihlum tawh

Philippines sorkarin an rama dan loa damdawi zuarte laka beihpui a thlak hnuah, damdawi zawrhnaa inhnamhnawiha puh mi 1,800 tihhlum an ni tawh nia sawi a ni.

Philipines Nation Police Chief Ronald Dela Rosta chuan Thawhṭanni khan Senate committee hmaah beihpui thlak mek chungchang hi sawiin, July 1-a police-ten beihpui an thlak aṭang khan dik lo taka damdawi zuar leh hmangsual ṭhin mi 712 thah an ni tawh a ni, a ti. Hei bakah hian damdawi kaihhnawih thila thah, mi 1,067 te thih dan pawh an chhuichiang mek a ni, a ti.

United Nations chuan damdawi zuarte laka beihpui thlaknaa mi tam tak thah an ni chu thil ngaihtuah ngai tak niin a lo sawi tawh a, hemi hnu hian US State Department thupuangtu Mark Toner pawhin Philippines President Rodrigo Duterte-a kaihhruai sor≠kar chuan beihpui a thlak meknaah mihring dikna chanvo neih palzut sak lo turin a ngen.

President Duterte chuan UN chu na takin a sawisel a, an ram inrelbawlnaa inrawlh lo tura tiin UN chu chhuahsanah a vau a, China leh ram dangte chu global forum thar siam turin a sawm nghal bawk. Mahse Thawhṭanni khan foreign minister Perfecto Yasay chuan Phillipines chu UN member a nih zui zel tur thu a sawi a, President chuan a rilru na leh rilru hah vanga hetiang zawnga sawi hi niin a sawi.

Yasay chuan President Duterte chuan beihpui an thlak mekah mihring dikna chanvo humhalh sak zel a tiam tih sawiin, police-te pawh thil awmdante chhui chiang a, dan palzut zawnga chete chu thubuai siamsak turin a hrilh a ni, a ti.

Police hotu Rosa chuan damdawi hmanga sumdawnnaah hian police officer 300 vel an inhnamhnawih nia rin≠hlelh an nih thu a sawi a, heng mite hi chhui chiang≠in an inhnamhnawih a nih chuan ban an nih bakah thubuai siamsak an ni dawn tih a sawi.