Raltlan 135,000 chuang Europe-ah an lut tawh
United Nations High Commissioner for Refugees chuan kumin kumtir aṭanga June thla thleng khan tuipui aṭangin raltlan, mi 135,000 chuang Europe-ah an lut tawh tih a sawi.
UNHCR thupuangtu Brian Hansford chuan raltlan lut zat hi a la punchhoh zel a rin thu a sawi. Kumin chhunga Europe rama raltlan lut zat hi nikum aiin 80% in an tam zawk.
Hetihlai hian Europe ram hrang hrangte chuan an rama raltlan leh pem luh tum pung chak zelah, ruahmanna siam dan tur an la rel fel thei lo.
Europe ram zingah chhim lam ramte chu raltlan luh tamna an ni a, kumin chhunga raltlan luh tamna ber chu Greece a ni. June thla tir aṭang phei chuan kar tinin Greece ramah hian raltlan 1,000 chuang lut ziah anga ngaih a ni.
Europe rama tlanchhia zinga a tam ber hi tualchhung buaina nasa tak thlen mekna, Syria ram aṭanga kal an ni. Kuminah Syria aṭang hian mi 44,000 vel chu Europe-ah hian an tlan lut tawh a, Eritrea leh Afghanistan ram aṭanga kalte'n an dawt.