IS-in Hamas vauna video a tichhuak

Islamic State (IS) fir­fiakte chuan video thar tichhuakin, Gaza Strip-a ro­reltu Palestinian fir­fiak pawl, Hamas chu paih­thlakah a vau.

Video hi Syria ram aṭangin an tichhuak a, Hamas-te chu sakhua an kenkawhna lamah an khauh tawk lo nia sawiin tihchhiatah an vau a ni. "Juda-te ram (Israel) kan tichhia ang, nangni leh Fatah pawh kan tichhe bawk ang," tiin an sawi.

Hamas-te an paihthlak hnuah Gaza-ah chuan Islamic dan, Sharia law hman a ni dawn tih sawiin, IS chuan tuna Syria rama thil thleng mek ang chu Gaza-ah pawh a la thleng dawn a ni, an ti. Video hi minute 16-a thui a ni a, video-a langte hian an hmai an tuam vek a ni.

IS-te hian Thawhlehni khan Syria-ah hmeichhe pahnih lu an tan sak. Syrian Observatory for Human Rights hotu, Rami Abdulrahman chuan Syria khawchhak lama Deir al-Zor province-ah firfiakte hian hmeichhe pahnih an tihlum tih sawiin, an rual hian pakhat zawk pasal pawh an that a ni. An vai hian dawithiama puhin an tihlum a ni.

Firfiak pawl hian Syria ram chhunga a ram mi leh ramdang mi eng emaw zat an tihlum tawh a, an zingah hian chhawmdawl hna thawktute pawh an tel. Islam dan palzuta an puhte chu an tihlum ṭhin a ni.

IS hian Thawhlehni khan Turkey ramri bula Syria khua, Tel Abyad chu lak tumin an bei leh. Hemi hma hian Kurdish helpawl kut aṭangin Tel Abyad khawpui daia thingtlang khaw ṭhenkhat chu an la tawh bawk.

Syrian Observatory for Human Rights chuan Tel Abyad khawpuiah hian firfiakte leh Kurdish sipaite hi nasa takin an inbei a, firfiakte hian khawpui pawn lam aṭang hian an hual niin a sawi.

Hetihlai hian Syria sipaite hian IS-te kut aṭang hian Ghwyran district hmun tam zawk chu an la kir leh tawh tiin state television chuan a tarlang. Kurdish fighter-te puihnain, Syria sipaite hian Nashwa district pawh Thawh­ṭanni khan an la let tawh bawk.