Yemen tan-in aṭangin mi 1,000 chuang tlanchhuak

Yemen ram chhimthlang lam, Taiz khuaa tan-in chhungah buaina a chhuah hnuin, mi tang 1,000 chuang an tlanchhuak.

Tang tlanchhuak zingah hian al-Qaida firfiak pawl mi eng emaw zat an tel.

State news agency Saba chuan tan-in hi pawn lam aṭangin al-Qaida pawl thlawptute'n an bei tiin a sawi. Tan-in vengtute chuan an duty post kalsanin an beilet a, hei hi remchangah hmangin an inbeih lai hian mi tangte hi an tlanchhuak a ni.

Kumin March 26-a Saudi Arabia kaihhruai, Arab ṭangrual ramte'n Yemen sorkar paihthlak tumtu, Houthi helpawl laka beihpui an thlak hnuah tun ṭum hi jail-a buaina liantham a chhuah ṭum thumna a ni. April thla khan al-Qaida firfiakte'n chhim lam lawngchawlh hmun pawimawh, Mukalla an lak hnuah tang 300 an lo chhuah tawh bawk.

Yemen ramah hian Houthi helpawl leh sorkar sipaite an la inbei chhunzawm reng a, sipaite puiin Arab ṭangrual ramte chuan helpawl hmun pawimawh thlawhtheihna hmangin an lo bei bawk. Human Rights Watch chuan April 6 leh May 11 inkara Houthi chakna bial, Sadah-a Saudi Arabia-in beihpui a thlaknaah mi 59 an thi a, an zingah hian naupang 35 an tel tih a sawi. Chenna-in bakah bazar leh school-te kahchhiat a ni tih a tarlang bawk.