Myanmar-in Rakhine buaina chinfel dan ngaihtuah tur din dawn

Myanmar sorkar chuan Rakhine state buaina chinfel dan ngaihtuahtu tur advisory commission a din dawn a, UN Secretary General hlui Kofi Annan-a'n a ho ang.

Myanmar khawthlang lam, Rakhine state-ah hian Buddhist leh Rohingya muslim inkarah buaina a chhuak fo a, hei vang hian kum 2012, June 10 khan sorkar chuan state of emergency pawh a lo puang tawh a, kumin March 28-a sorkar thar lakluh a nih hma lawk hian a hlip chauh a ni.

Rakhine state buaina chinfel dan kawng zawng tura member pakua awmna tur advisory commission din a nih theih nan hian Ministry of State Counsellor office chuan Koffi Anna Foundaton chu memorandum of understanding a ziahpui dawn a ni. Commission-ah hian ramdang mi pathum leh ramchhung mi pathum an awm ang.

Commission hian Rakhine state-a pawl hrang hrang aiawhte an kawm kual ang a, buaina chinfel dan ṭha ber tura an ngaihte zawtin international expert leh ramdang palaite ngaihdante an lakhawm dawn bawk a ni. Thla 12 chhungin State Counsellor kaltlangin Myanmar sorkar hnenah report an thehlut ang a, rawtna an neihte pawh an thehlut nghal dawn a ni.