Italy-ah magnitude 6.2-a nain lir a nghing

Italy ram laili laiah nimin zing khan magnitude 6.2-a nain lir a nghing a, mi 38 an thi a, in tam tak a chhe bawk. Thi zat hi a la pun chhoh rin a ni.

Lirnghing inṭanna hi central Italy-a Umbria biala Rieti khaw bul, Norcia a ni a, a nghin hun hi an ram sanaah zing dar 3.36 a ni. Italy khawpui, Rome aṭanga mel 105 vela hlaa awm a ni.

Umbria region khawpui, Perugia leh a chhehvela thingtlang khaw hrang hrangah lirnghing hian chhiatna a thlen nasa hle. Amatrice, Accumoli, Posta leh Arquata del Tronto khuate chuan an tuar nasa ber a ni. He bial hi khualzin, a bikin British khualzinten an tlawh nasa hle.

Lirnghing hian in tam tak a sawi chim bakah, lei pawh a min nasa a, in chim hnuaia tangte chhanchhuah hna thawh mek a ni.

Amatrice Mayor Stefano Petrucci chuan an khuaa in zahve zel chu lirnghing hian a sawichhia niin a sawi a, in chim hnuaia nungdama awmte zawn leh chhanchhuah hna thawh mek a ni, a ti. Mayor chuan an khaw kalpawhna kawngte a chhia a, leimin nasa tak a thlen bakah lei chhia pawh a awm nual niin a sawi.

Norcia khuaah chuan lirnghing vang hian thi an awm hriat a la ni lo a, khawchhunga hmanlai hmun leh building hlui tak takte pawh an him niin Mayor Nicola Alemanno chuan a sawi.

Italy khawpui, Rome-ah pawh lirnghing hi an hria a, mahse thil tihchhiat erawh a nei lo.

Prime Minister Matteo Renzi chuan lirnghinna bialah hian chhanchhuah hna thawktu turte a tir nghal a ni.