NKorea-in ballistic missile kapchhuak
North Korea chuan nimin khan khawchhak lam tuipuiah tuihnuai lawng aṭangin ballistic missile a kapchhuak niin US leh South Korea official-te'n an sawi.
US official chuan NKorea missile kahchhuah hi KN-11 missile a nih thu leh, mel 300 vel a thlawh hnuah Japan tuipuiah a tlak thu a sawi. Japan Prime Minister Shinzo Abe pawhin NKorea missile kahchhuah hi Japan rama Air Defence Identification Zone chhungah a tla nia sawiin, NKorea thiltih chu a dem thu a sawi bawk.
Hetih lai hian SKorea leh US sipaite chuan kumtin an tihdan angin indo lemchan an zir mek a, hei hi NKorea chuan ngaimawhin a hma aṭangin a lo vau lawk tawh a ni. Ram pahnih sipaite chu an ram chin an dai a nih chuan na taka a beih let nghal tur thu a sawi fo a ni.
SKorea leh US sipaite nunchan zirnaah hian sipai 80,000 vel an tel a ni. Nimina NKorea-in missile a kahchhuah hi sipaite nunchan zir mek a duh lohna lantirna leh a vauna kawng khat nia ngaih a ni.
UN chuan NKorea hi ballistic emaw, nuclear technology emaw a hman a khap a, mahse khap a nih chung hian ṭum eng emaw zat a kapchhuak tawh a ni.