Taliban-in hmeichhe pual radio station ti tawp

Afghanistan-a rorellai, Taliban sorkar hnuaia Information and Culture Ministry chuan hmeichhe puala radio station, Radio Begum chu ram pawn lam TV channel ten phalna nei loa chhuah tur leh programme te pe ṭhinah puhin a tih tawp sak.

Ministry chuan Radio Begum hian broadcasting policy a bawhchhia nia sawiin, 'Vawi tam tak dan an bawhchhe tawh a, ram dang TV channel tan an chhuah tur leh programme te an pe ṭhin a ni," tiin an document hrang hrangte enfiahin, station hma lam hun tur chu ngaihtuah ṭhat a la ni dawn tih a tarlang.

Radio Begum hi kum 2021, March thla International Women's Day khan hawn a ni a, station aṭanga an thil tih chhuah hi Afghanistan hmeichhiate buatsaih vek a ni. A thawhpui satellite channel, Begum TV chu France aṭanga pek chhuah a ni thung a, Afghanistan-a school curriculum, Class 7 -12 a kalpui dante a ti chhuak ṭhin.

Rights group hrang hrang chuan Taliban sorkar thutlukna siam hi sawiselin, sut leh turin an phut.