Italy-ah lirnghing vanga thi 240 tling tawh

Italy rama magnitude 6.2-a naa lirnghing avanga thi zat chu mi 240 an chuang tawh a, in chim hnuaiah mi eng emaw zat an la tang nia hriat a ni a, chhanchhuah hna thawh mek a ni.

Nilaini zing khan central Italy-ah lir hi a nghing a, lirnghing hian in tam tak a sawichhiat bakah, lei pawh a min nasa hle. Italy civil protection authority chuan nimin thleng khan lirnghing vanga thi hi mi 247 an ni taw a, midang 368 in hliam an tuar niin a sawi. Thi zinga mi 190-te hi Rieti province ami niin, mi dang 57 te chu Ascoli Piceno province-a mi an ni.

In chimin a delhte chanchhuah hna hi ngawrh taka thawh chhunzawm zel a ni a, Nilaini zan tlai tawh takah khan Pescare del Tron khuaah, in chim hnuaia darkar 17 a tan hnuah hmeichhe naupang chu him taka chhan≠chhuah a ni. He khuaa in hi lirnghing vang hian a tlusawp deuh vek a ni.

Lirnghing hi Umbria, Lazio leh Le Marche biala tlangram khuaten an tuar nasa a, Nilaini zan khan mi tam tak chu mahni inah pawh awm zui ngam loin khawlaia puan-inah an awm a ni. Heng bialah hian ṭum eng emaw zat aftershock a thleng a, a na ber chu magnitude 4.7 a tling.

Amatrice khaw mayor chuan lirnghing hian an khua hmun lia ṭhena hmun khat a tichhia a, in dingte pawh luah zui ngam an awm lo niin a sawi. Prime Minister Matteo Renzi pawhin he khua hi a tlawh tawh a ni.

Italy ramah hian lir a nghing fo a, kum 2009 khan L'Aquila-ah lir≠nghing vangin mi 300 chuang an thi a, kum 2012 May thla khan Emilia Romagna bialah lirnghing vangin mi 20 an thi bawk.