Colombia sorkar leh FARC helten inremna ziak

Colombia sorkar leh Fuerzas Armadas Re≠volucionarias de Colombia (FARC) helpawlte chuan kum sawmnga zet an inbeih hnuah inremna thuthlung an ziak thei ta.

Sorkar leh helpawl aiawhte hian inremna kawng zawngin kum li zet an inbe tawh a, Nilaini khan inremna an siam tak thu hi an puang a ni. He inremna siam hnuaiah hian helte hian an ral≠thuamte dahin, nunphung pangngai an zawm tawh dawn a ni.

Havana-ah Cuba palai Rodolfo Benitez kaihhruaina hnuaiah inremna hi an ziak a, hemi hnu hian thuchhuah inṭawm siamin, Colombia rama remna leh muanna a awm an duh thu an sawi. Inremna an siam chungchangah hian October 2 hian ram mipuite ngaihdan lak a ni ang.

Inremna thuthlung an siam hi nimin khan Colombia Congress-ah thawn a ni a, hemi hnu hian internet leh social media lamah dahchhuah a ni dawn a ni.

Sorkar leh heltein inremna hi point paruk an siam a, an inremna hnuaiah hian tualchhung buaina thleng tuartute tana rorelna dik siamsak te, ram pek te, hel inpete politics lama an inhman theihna tur te, ruihhlo tawlhruk ṭhin venna tur te, helhoin sorkar kuta an ralthuam an thehluhna turte pawh tarlan a ni.

FARC hian ramhnuai≠a an bihrukna hmun aṭang≠in an pawl member-te chu United Nations-in camp a siamah an sawn dawn a ni. FARC helpawl hian member 7,000 vel a la nei nia chhut a ni. Nun≠phung pangngai an zawm hnuah FARC hi political party ah leh a ni zui dawn bawk a ni.

Colombia sorkar leh FARC helpawlte hi kum sawmnga zet an inbei tawh a, hemi chhung hian mi 220,000 velin nunna an chan phah a, mi nuai tel chu tualchhung buaina avang hian hmun him lamah an tlanchhe tawh bawk.