Myanmar-a lirnghingin pagoda 190 tichhia

Myanmar ramah Nilaini khan magnitude 6.8-a nain lir a nghing a, lirnghing vang hian mi pali an thih bakah, Bagan-Nyaung Oo bial leh Rakhine state-ah Buddhist temple 'pagoda' 190 a tichhe bawk.

Nilaini tlai dar 5.04 khan central Myanmar-ah lir hi a nghing a, lirnghing hian Pakkoku khuaa vaihlo sawngbawlna factory a tichim a, mi pahnih an thi. Yenanchaung khuaah mi pahnih an thi bawk niin Information and Public Relations Department chuan a tarlang.

Lirnghing inṭanna hi Mandalay khawpui chhim thlang lam, km 197.9 vela hla leh Chauk khawthlang lam km 19.3 a hlaah a ni. An ram kahwpui Nay Pi Taw leh Yangon-ahte pawh lirnghing hi an hria a ni. Nay Pyi Taw-a House of Nationalities building pawh lirnghing vang hian khi a ni.

Kumin January thla aṭang khan Myanmar ramah hian ṭum 26 zet lir a nghing tawh a, heng zinga nimina mi hi a la na ber a ni. Lirnghing hian in eng emaw zat a sawichhia a, hmun tam takah electric supply pawh a chhe bawk.

Myanmar sorkar chuan lirnghingin pagoda a sawichhiatte enfiah tur leh veng turin police leh sipaite a tir nghal a ni. Lirnghingin pagoda a sawichhiatte hi kum za chuanga upate an ni hlawm a ni.