Sinai-a inbeihnaah mi 100 chuang an thi

Egypt ram Sinai hmar­lam bialah Nilaini khan Egypt sipai leh Islamic State (IS) thlawptu firfiak pawl, Province of Sinai inti te chu nasa takin an inbei a, an inbeihnaah hian firfiak 100 chuang leh sipai 17 an thi.

IS thurualpuite hian Sinai bial chhunga Sheikh Zuweid khuaah sipai checkpoint eng emaw zat chu car bomb hmangin an tichhia a, hei hi sipaite'n an chhang let ve nghal. Sipaite hian firfiakte laka beihpui thlakna atan hian F-16 jet leh Apache helicopter-te an hmang tel a, Nilaini zan khan Sinai hmarlam bial chu sipaite thununna hnuaiah a awm tawh tih an sawi.

Firfiakte hian khaw chhunga police station lian ber pawh mortar hmangin an bei a, army camp bulah bomb an kam bawk.

Sinai biala firfiak pawl hian kum 2013 aṭang khan Egypt sorkar dodalna an chhunzawm reng a ni. Sinai bial hian hma a sawn chak lo hle a, hei vang hian he biala chengte chuan Egypt sorkar chu anamahni ngaihsak tawk lo leh an chan tur ang pawh pek tum loah an ngai. Sorkar laka lungawi lo, tribal mi tam tak chuan firfiak pawl hi an zawm tawh a ni.

Province of Sinai pawl hi a hma chuan Ansar Beit al-Maqdis tih an ni ṭhin. Nikum November thla khan IS an thlawp thu sawiin, an pawl hming pawh hi an thlak nghal a ni.

Egypt sipaite chuan IS firfiak thurualpuite chu an hmeh mih hma chuan an lakah beihpui an thlak chhunzawm zel dawn tih an sawi a, nimin zing pawh khan thlawhtheihna hmangin firfiak pawlte hmun pawimawh an beih chhunzawm.

Israel Prime Minister Benjamin Netanyahu chuan Egypt rama IS fir­fiak kut tuara thi chhungte leh Egypt sor­kar chu a tuarpui thu a sawi a, Islam firfiakte bei tur hian an thawhho a ngai a ni, a ti.