US-ah mihang biak-in paruk hal tawh
Kar hnih liamta khan US South Carolina state-a mihang biak-in beih a nih hnuah, US chhim lama mi hang biak-in beih chhunzawm zel a ni.
Charleston, South Carolina-a mihang biak-in, Emanuel African Methodist Episcopal chu chi inthliarna lam thlawptu pakhatin silai kenga beiin, biak-ina awmte a pawng kah a, mi pakua an thi.
He thil thlen hnu hian mihang biak-in paruk vel chu beih an ni leh tawh a, Georgia, North Carolina, South Carolina leh Tennessee thuneitute chuan mi hang biak-in bitum bik a nih dan hi an chhui mek.
Thawhlehni zan khan Greeleyville, South Carolina-a Mount Zion Church chu hal a ni a, he biak-in hi kum 20 kalta khan Ku Klux Klan-te'n an lo halsak tawh bawk. Mount Zion Church hal hma hian biak-in dang panga-ah kangmei a chhuak a, heng zinga pathum chu hal luih ngei a ni tih finfiah a ni tawh bawk.