Philippines-a lawng chesualah mi 36 an thi

Philippines rama Leyte thliarkar tuipuiah nimin khan khualzin 173 chuanna lawng chesualin a let a, mi 36 an thi.

Kim Nirvana lawng hi Ormoc aṭanga Camotes thliarkar pana kal a ni. Mahse Ormoc lawng chawlh hmun aṭanga kilometre khat vel chauh a kal hnuah a chesual ta a ni. Lawnga chuang zinga mi 118 chu chhanchhuah an ni a, chin hriat lohin mi 18-te an awm.

Lawng chetsual thu hriat a nih veleh Coast Guard chuan chhan chhuah hna thawk tur a tir nghal a ni. Lawng chesual aṭanga chhan chhuah zinga mi 53-te chu damdawi-inah enkawl a ni. Lawngah hian khualzin 173 bakah thawktu 16 an awm bawk.

Leyte thliarkarah hian kum 2013 November thla khan thlipui Super Typhoon Haiyan tleh vangin mi 7,350 an thi tawh bawk.

Philippines ramah hian lawng ṭhat tawk loh vang te, a enkawlna lam inthlahdah avang tein lawng a chetsual fo tawh a ni. Kum 1987 khan khawvela tuipuia chetsualna rapthlak ber thlengin, Dona Pez lawng leh oil tanker insut avangin mi 4,300 chuangin nunna an chan tawh bawk.