Bolivia miner-te'n minister an that

Bolivia rama thil lai chhuaktu miner-te'n an ram Deputy Interior Minister Rodolfo Illanes chu an rukbo hnuah an that zui niin sorkar thuchhuak chuan a tarlang.

Sorkar thupuangtu, Carlos Romero chuan nawrh huaihawt mek, miner-te hmu tur hian Ninga≠ni zing lam khan Minister Illanes hian Panduro a pan a, mahse miner-te hian lo manin na takin an sawisa zui ta niin a sawi. Sorkar chuan minister ruang hi lak tumin a bei mek niin a sawi.

Bolivia miner-te hian thil laichhuahna tura environment rules tihnep te, private company tana thawh phalna te, sorkarah an pawl aiawha chanvo pawimawh zawk pek phutin nawrh an huaihawt a ni. Thawhlehni aṭang khan Panduro-ah kawngpui an dang a, Nilaini khan nawrh huaihawtte leh police-te intibuaiin, hnathaktu pahnih an thi a, police officer 17 in hliam an tuar.

National Federation of Mining Cooperatives of Bolivia chuan mining dan thar siam tura sorkar nena an inbiakna a hlawhchham avangin tiamchin awm loin nawrh hi a huaihawt a ni.