Turkey-in Syria-ah tank dahluh belh

Turkey chuan Syria hmarlama Islamic State (IS) firfiakte laka beihpui a thlak mekah, Ningani khan tank eng emaw zat a dah luh belh.

Turkey ramri bul, Syria rama IS firfiakte laka beihpui thlak hna hi Turkish special force leh Free Syrian Army (FSA) fighter ten an thawk mek a, US-in thawhtheihna hmangin a lo pui bawk. Nilaini khan IS kut aṭang hian Jarablus khua chu an lak let sak tawh a ni.

Turkey Prime Minister Tayyip Erdogan chuan beihpui an thlak mek, Operation Euphrates Shield chu ramri-a IS nuaibona tur a nih rualin, IS firfiakte hmun ruak luah tuma Kurdish helpawl YPG-te chet lak tur lo danna a ni tel tih a sawi. Turkey hian YGP-te hi kar khat chhunga Euphrated khawchhak lama insaseng turin a hriattir tawh a ni. Kurdish fighter-te hian US thlawpnain IS kut aṭanga Manbij khua lak tumin an bei a ni.

Ningani khan US Secretary of State John Kerry chuan Turkey Foreign Minister Mevlut Cavusoglu biain, Turkey-in a ngen angin YPG fighter-te chu Euphrates khawchhak lamah an insawn tih a hrilh.

YGP hi Syria rama helpawl chak ber zing mi niin,US thlawpa ṭangrual ramten Syria rama IS firfiakte an beihnaah an pui a ni. Mahse Turkey chuan ramri bula IS firfiakte laka beihpui a thlak mekah YGP hi an inrawlh chuan, Kurdish helpawl hian an ram chinah an inzarpharh zel a hlauhthawng a ni. Turkey Defence Minister Fikri Isik chuan IS-te nuaibo chu an tum ber a nih rualin, hei hi a tawk lo a, IS thlaktu tur hian Kurdish party PYD leh YPF helho chu an awm an remti dawn lo tih a sawi.