Syria-a Daraya khaw mite sawn chhuak dawn

Syria sipai leh sorkar laka helte inbeihna thleng mek avanga tlawhpawh theih loha awm, Daraya khuaa chengte chu hmun dangah sawn chhuah an nih theih nan sorkar leh helte chuan inremna an siam.

Daraya khua hi Syria khawpui, Damascus khaw thlang lama awm a ni a, hun rei tak hel leh sipaite hi an inbei tawh a ni. Inremna an siam hmang hian he khuaa cheng civil mi 4,000 chuang chu sorkarin an awmna tura a siamah hruaichhuah an ni ang. Hetihlai hian hel 700 vel chuan he khua hi an chhuahsan dawn bawk a, an ralthuam sorkar kuta an pek hnuah Idlib khaw lamah an kal dawn a ni.

Syrian Observatory for Human Rights chuan Daraya hian kum li zet an buai hnuah inremna hi an siam thei ta niin a sawi. Inremna an siamah hian hel zinga Daraya khaw chhuahsan duh lote chu criminal record an neihte chinfel a nih hnuah an awm chhunzawm phalsak an ni ang. Civil mi la awm chhunzawm duhte pawh damdawi lam enkawlnate pek an ni bawk ang.

Daraya khua hi hel kutah a awm reng a, kum 2012 aṭang khan Syria sipaite chuan laklet tumin an bei a, inbeihna hi a thlen reng avangin khawchhung mite hian harsatna an tawk nasa hle a, ei tur leh tui thianghlimte an tlachham fo a, power supply pawh an nei
ṭha lo hle a ni. Kum li zet buaina an tawh hnuah kumin June thla khan khawchhung mite hian pawn lam aṭanga chhawmdawlna an dawng ve ṭan chauh a ni.