Thailand lal thuneihna siamṭhat phutin nawrh huaihawt

Thailand lal King Maha Vajiralong­korn rorelna duh lohna lantirin Bangkok-ah Inrinni leh nimin khan mi tam takin nawrh an huaihawt a, an ram lal hnena thuneihna sang tak pek a nih dan chu siamṭhat an phut. 

Thla hnih dawn chu mipuite hian an lal thuneihna chin siamṭhat an lo phut tawh a, hei bakah hian prime minister Prayuth Chan-ocha chu bang tur leh, ram danpui thar siam a, inthlan buatsaih an phut bawk a ni. 

Nimin khan zing aṭangin nawrh huaihawtte hi Grand Palace-ah an pungkhawm a, an ram chu mipuite ta a ni a, mipuite bumtu lal chhungkaw ta a ni lo tih thuziakte an keng a ni. 

Hetih lai hian an lal, King  Vajiralongkorn chu Thailand-ah hian a awm lo thung. Lal hian a hun tam zawk chu Europe lamah a hmang nia sawi a ni. 

Thailand ramah hian an lal thuneihna hi a sang hle a, lal leh lalchhungkaw member-te sawisel zawnga thu sawi pawh khap niin, hremna na tak pek theih an ni. Mahse tun hnaiah ṭhangthar zawkten hei hi ngai thei loin, lal thuneihna siamṭhat phutna hi university campus aṭangin a inṭan a, kum upa lam zawkte pawhin an hmalakna hi an thlawp chho tawh a ni. Nawrh huaihawtte chuan an ram lal chu an zah hle a, mahse lal pawh hi ram danpui hnuaiah a awm ve tur a ni, an ti.