US-ah TikTok hman chhunzawm rem ti
US President Donald Trump chuan US-a video app Tiktok a awm chhunzawm theihna tura company-ten inremna an siam chu a thlawp thu a sawi.
White House-a thuthar lakawmtute a kawmnaah Trump chuan TikTok neitu ByteDance, Oracle (Computer software company) leh Walmart (Retail company)-te chuan inremna an siam thu a sawi a, heng company pathum te hi an thawk ho dawn a, an thawhhona thar tur hi TikTok Global tih a ni tawh thung ang. Mahse he inremna siam hi China in a pawmsak ve leh phawt a ngai a ni.
Tiktok Global-a 53% chu US shareholder-te kutah awmin, Chineser investor-te chuan 36% an chang ve thung dawn a ni. Trump chuan company thar hi Oracle leh Walmart te kuthnuaiah vek a awm dawn a ni, a ti.
US-a TikTok hmangtu hi mi maktaduai 100 vel an ni. Trump chuan Amercia mite tana security him tawk turin TikTok Global-ah hian hmalakna neih a nih thu a sawi. Trump chuan US dollar vaibelchhe 5 chu education fund atan company-te inrem siamnaah hian a tel tih a sawi bawk.
August thla khan Trump chuan an ramah TikTok hi khap tum a nih thu a lo sawi tawh a, a hmangtute personal data hi China sorkarin a hriatruk sak nia sawiin, hei hi ram security atan a him loah an ngai a ni.