Donald Trump-a'n dan loa awmte thawn haw tiam

US Republican presidential candidate, Donald Trump chuan November thlaa US President thlanna neih hunah thlan tlin a nih chuan, President atana lakluh a nih veleh an rama dan loa pemlut leh hanthawka awmte chu thawn haw tura hma lak
ṭan nghal a tiam. US President thar hi nakkum January 20-ah lakluh tur a ni.

Des Moines, Iowa-a thu a sawiah, Donald Trump chuan, "Ni khat ni
aṭangin kan rama dan loa pem lutte chu thawn haw turin ka bei nghal dawn ni" a ti. Ramri hungna bang siamin, dan loa pem lutte hamṭhatna hrang hrang an dawnte pawh titawp turin a bei dawn a, hei bakah hian an visa tawp hnu thlenga US-a la chambang zuite pawh dapchhuakin a thawn haw zel dawn tih a sawi.

Trump chuan visa expiration date liam tawh hnua awm zuite chu ngaihnathiam an ni tur a ni lo tiin, "Hei hi kan ngaihthah a ni chuan ramri zalen tak a awm tihna ang a ni" a ti. A khingpui, Democratic candidate Hillary Clinton-i chu president atana thlan tlin a nih chuan ramri zalen taka hawn an duh tihna a ni a, Trump thlan tlin a nih chuan dan lalna leh kenkawhna ram an din dawn tihna a ni, a ti.