Sweden-a inpawngkahna thlengah mi 11 an thi

Sweden khawpui, Stockholm khawthlang lama adult education centre-ah an ram huna Nilaini zing lam khan inpawngkahna a thleng a, mi 11 an thi. Hliam tuar eng emaw zat awmin an zinga mi panga te chu an dinhmun a ṭha lo hle a, thi zat an la pung maithei niin official-ten an sawi.

Pawikhawihna thlenna hmun hi Campus Risbergska tih niin, an rama pem lut kum 20 leh a chung lamte tan Swedish ṭawng zirna a awm a, hei bakah rilru lama rualban lote tan vocational traning leh programme an siam bawk ṭhin. Stockholm khawthlang lam, km 200 vela hlaa Orebro khaw daia awm a ni.

Police-te chuan pawikhawihtu hi mi pakhat niin thi zingah hian a tel niin an sawi a, amah intihlum nia rin a ni. Thurualpui a nei lo a, firfiaka chetna nen inzawmna a nei lo nia a lan thu an sawi bawk. Nilainia pawikhawihna a thlen hma hian pawikhawihna dang thlengah inhnamhnawiha a neih hriat a ni lo bawk.

Inpawngkahna thleng vanga thi te sunna atan Nilaini khan Swden rama sorkar building zawng zawng leh lal inahte an hnam puanzar a ngul chanveah zar a ni.

Kum 2024 khan Sweden ramah inkahna hi ṭum 296 thlengin, mi 44 in an nunna an chan a, hliam tuar 66 an awm. Kum khat chhunga inkahna thlen tam ber kum chu 2022 kha niin, ṭum 391 a thleng a, mi 62 thiin mi dang 107 in hliam an tuar a ni.