Singapore-ah Zika virus vei mi 41 awm tawh

Singapore health ministry leh National Environment Agency (NEA) chuan thuchhuah siamin, Singapore-ah tunlaia hri leng mek, Zika virus vei finfiah tawh mi 41 an awm tawh tih an sawi. Midang eng emaw zat enfiah an ni dawn tih an sawi bawk.

Health ministry leh NEA hian Pathianni khan thuchhuah hi an siam a, Zika vei finfiah zinga mi 34 te chu an dam tawh a, an zinga pasarih chu damdawi-inah enkawl mek an ni, a ti.

Thuneitute chuan mi 124-te thisen endik a nih thu sawiin, an zinga tam zawk chu ramdang mi hnathawka awmte an ni. Mahse heng mite hi khawi ram aṭanga kal nge an ni tih tarlan ala ni lo a, Zika an vei hun pawh hi sawichian a ni lo bawk.

Kar kalta khan mi pali-in virus hi an vei tih hmuhchhuah leh a ni a, Inrinni khan damdawi-inah dah luh nghal an ni.

Singapore-a Zika virus vei hmuhchhuah zingah he natna hri lenna, South America biala zin hnaivai an awm lo a, hei vang hian tualchhung aṭanga an vei nia a lan thu thuchhuah chuan a tarlang. Zika vei hi ramchhung hmun dangah pawh hmuh belh an inrin thu ministry chuan a sawi.

Singapore-ah hian May thla khan Zika hri vei hmasa ber chu hmuhchhuah a ni a, he hri veitu hi Brazil rama zin haw a ni. Hemi hnu hian an ram chhunga medical service zawng zawngte chu hriattirna pek nghal an ni a, fimkhur tur leh, Zika hri vei nia rinhlelhte chu health ministry-ah report nghal zel tura hrilh an ni.

Malaysia ram pawhin Singapore-a Zika virus vei hmuh an nih tak avangin Singapore nena an inkalpawhna lamah pawh uluk zawka endik a ni dawn tih a sawi a, an ram mipuite hnenah Zika hri leng laka inven dan tur te, a hri vei nia langte hnenah damdawi pek tur an ziahna lehkhate an sem a ni.

Thailand ramah pawh kumin chhungin province 10-ah Zika vei hi mi 100 vel hmuh an ni tawh a, tunhnaia Brazil rama Olympic Games-a tel, infiammite pawh an ram an thlen hnuah hian uluk taka endik leh vek an ni.

Vietnam ram pawhin Zika vei hi mi pathum hmuh an ni tawh tih sawiin, heng mite hi ram pawn lamah an zin chhuak lo a, tualchhung aṭanga an kai niin an sawi.

Zika virus hi thosi aṭanga inkaichhawn theih a ni a, nikum khan Brazil ramah a hri vei hi hmuh niin, America ram hrang hrangah a darh tawh a ni. Hmeichhe naupai laite tan Zika hri an vei chuan an nau paiah nghawng ṭha lo tak a siam thei a ni. Brazil rama nau piang zingah pianphung pangngai aia lu te, mi 1,600 te chu Zika hriin a thlen nia ngaih an ni.