Iraq-in Saudi Arabia ambassador thlak turin ngen

Iraq chuan an rama Saudi Arabia ambassador awm mek chu thlak turin Saudi Arabia sorkar a ngen.

Saudi Arabia ambassador Thamer al-Sabhan hi kumin January thla khan Iraq-ah hian dah chauh a ni. Al-Sabhan hian Iran sorkar thlawp, Shia paramilitary unit leh Iraq-a Sunni Muslim inkar boruak a ṭha lo hle tih sawiin, Iran-in IS firfiakte laka beibpui a thlaknaah pawh Shia paramilitary group hi telh lo turin a ngen. Shia helpawl hruaitu, Aws al-Khafaji pawhin interview-naah Saudia palai chu an that thei a nih chuan thil lawmawm tak a ni dawn a ni tih sawiin, thah tumin an phiarru a ni tih a sawi.

Hetiang zawnga thu a sawi chhuah fo avang hian Iraq mi eng emaw zat chuan foreign ministry office-ah al-Sabhan-a lakah complaint an thehlut a, hemi hnu hian ministry chuan Saudi Arabia hnenah ambassador hi thlak turin a ngen ta a ni. Saudi Arabia ambassador hian Iraq-a Shia politician-te dinhmun tihnep sak a tum nia sawiin, Iraq leh Saudi Arabia inkar boruak pawh a tichhe zawk a ni, a ti.

Iraq-in Kuwait a run hnuah Saudi Arabia hian Iraq-a palai a dah chu a titawp reng a, kum 2015 December thla khan Baghdad-ah a embassy hi a hawng leh chauh a ni.