Bolivia minister thihnaah miner hotu mawhphurtuah puh

Bolivia rama thil laichhuahnaa thawkten Deputy Interior Minister Rodolfo Illanes an thah chungchangah thil laichhuaktu pawl, National Federation of Mining Cooperatives of Bolivia president Carlos Mamani leh an pawl official pahnihte chu mawhphurtuah puh a ni.

Deputy Minister Illanes hi mining law leh an hlawhbi siamṭhat phuta nawrh huaihawt mek, miner-te dawr tur hian kar kalta Ningani khan Panduro khuaah a kal a, mahse miner-te hian lo main an sawisa hlum a ni.

Miner-te hian dynamite leh hmanraw dangte an hmang a, kawngpui pawh hun eng emaw chen an dangchat bawk.

Bolivia Attorney General Office chuan minister thihna kaihhnawihah hian miner 40 man an ni tih sawiin, an zingah hian an president Carlos Mamani pawh a tel. Bolivia President Evo Morales chuan a deputy minister thah a ni chu President a nihna aṭanga paihthlak tuma beihna chi khat niin a sawi.

Bolivia ramah hian miner nuai khat vel an awm a, heng mite hi cooperative hnuaiah awmin zinc, tin, silver leh gold mine-ahte an thawk a ni. Heng miner-te hian sum tam zawk an lak luh theihna atan private company-te thawhpui an duh a, mahse hei sorkarin a phalsak lo. Hei vang hian mining law siam-
ṭhat phut≠in nawrh an huaihawt mek a ni.